Шляхі вялі, гулі, плылі... Дзе толькі ні насіла Мяне па глобусе Зямлі Дапытлівасьці сіла. Сваёй мяцежнасьцю скарыў Натхненьня геній сьмелы: Антычных гарадоў муры, Сікстынская капэла. Запамінала ўсё душа, І ёй было не посна – Нямецкі грунт, французскі шарм, Амэрыканскі поступ. А ў сэрца наплывала шыр, Сама, нібыта дзіва. Карпаты, Альпы і Памір – Паўсюль нага хадзіла. Быў пада мною акіян, Было рыгво вулкана. Сьвет раскаціўся, як дыван, Дарогаю сатканы. Дарога падвышае дух, Бадзёрыць, а найболей Я ўпадабаў вандроўны рух За адчуваньне волі. Той час хаваецца ў смузе, Хоць помніцца заўсёды. А конік крэўнасьці вязе Мяне да несвабоды. Яна зыходзіць ад бяроз, Ад студні нізкаватай, Ад дажджавых халодных сьлёз На шыбах сумнай хаты. Ёсьць на Зямлі такі куток, Які адсуне ўсё набок, І там мая дарога, Як пёс, скруцілася ў клубок І сьпіць каля парога.
|
|